اقسام الكلية

يوجد ثلاث اقسام رئيسية فى جميع الكليات هما:
Is - Cs - It
اقسام الكلية تختلف من كلية لاخري
أولاً : اقسام الكلية الموجودة في كل الجامعات : أ - قسم علوم الحاسب Computer Sciences Department = CS : القسم ده من اجمل الاقسام اللي في كلية الحاسبات و المعلومات ... و ده لأنك ح تاخد فيه معظم لغات البرمجة الموجودة في الكمبيوتر يعني مثلاً زي ( السي و السي بلس و السي بلس بلس و الجافا و الاسيمبلي و السي شارب ... الخ الخ ... ) .. القسم ده الرياضه فيه مش كتير قد ما البرمجه فيه اكتر .. المواد بتاعته بتختلف من جامعة لجامعة , لكن عموماً المواد باختصار بتعلمك ازاي تترجم لغات البرامج و ازاي تدرس البنية التحتية للبرمجيات , لانك ح تبقى مصمم برمجيات او مبرمج , و المبرمج بيهتم بالبنية التحتية للبرنامج .. كذلك بتاخد مقتطفات عن برمجة الشبكات و مواقع الانترنت ... لكن دراستك في هذا القسم بتنصب على برمجة الحاسب ... التخصص في هذا القسم من سنة تالتة في بعض الجامعات زي حلوان ... و في من سنة رابعة زي عين شمس ... و في حاسبات بنها مفيش غير القسم ده و بس ... طبعاً لقبك في مصر بيبقى مبرمج او مطور و رسمياً اسمك اخصائي حاسب , في بره مصر : مهندس برمجيات ... المستقبل في هذا القسم مشرق جداً , و شغلك ح يكون في شركات الكمبيوتر اللي في مصر .. و يا سلام لو طلعت من العشرة الاوائل في الكلية , شركات زي مايكروسوفت و اوراكل بتاخدك تشغلك ... - - - - - - - - - - - - - - - - - -

ب - قسم نظم المعلومات Information Systems Department = IS : قسم نظم المعلومات من اجمل اقسام الكلية فعلاً ... و للعلم لا خريج من نظم معلومات الا و بيشتغل في شركات كبيرة و بمرتبات رائعة ... طبعاً نظم المعلومات بتدرس برمجة و بعض من شبكات الانترنت و الاتصالات و بعض من مواد التسويق و ادارة الاعمال ... طبعاً البرمجة هنا باقصد برمجة قواعد البيانات SQL ... الا انه برضه بياخد بعض لغات البرمجة مش كلها .. بس دراسته تنصب على قواعد البيانات ... المواد باختصار بتتكلم عن التجارة الالكترونية , و برمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي ... بالبلدي , ازاي تتعلم تصمم برامج لادارة الشركات و البنوك ... و ازاي تخزن بيانات الشركة كلها على برنامج واحد او على موقع انترنت واحد ... لقبك جوه مصر : اخصائي نظم او مطور او مبرمج برضه , بره مصر : مهندس معلومات , او مهندس معلوماتية ... المستقبل هنا لا تعليق , كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر , لان الشغل هنا بيبقى احسن كمان ... بس خد بالك , لو ليك في برمجة قواعد البيانات فعلاً , يبقى عليك و على القسم ده ...
========================================

ثانياً : اقسام الكلية اللي مش موجوده في كل الجامعات : أ - قسم تكنولوجيا المعلومات Information Technology Department = IT: قسم متميز جداً , و دراسته ممتعة جداً ... و هنا ح تلاقي اسم القسم بالانجليزي شيك ... و كمان ح تلاقي دراسته شيك و باختصار , هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين اللي عمله ... و تتعلم برضه ازاي تبرمج مواقع الانترنت الكبيرة و ح تاخد لغات برمجة خاصة بالمجال ده زي الفي بي سكريبت و الروبي و البايثون و الجافا طبعاً ... دراسته بجد ممتعة جداً , و القسم لا غنى عنه في اي شركة كبيرة .... المواد باختصار بتتعلم فيها ازاي تبرمج الشبكات , ازاي تبرمج مواقع الانترنت الكبيرة , و فيها مواد اتصالات ... اسمك مبرمج او مطور , بره مصر : مهندس شبكات يمكن معنديش معلومات كافية عن القسم , الا ان شغلك مطلوب في اي شركة كبيرة ... القسم ده طبعاً موجود في اغلبية كليات الحاسبات و المعلومات , مش كلها ...

ب - قسم نظم الحاسبات Computer Systems Department = CS : هنا في القسم ده , يمكن ح تلاقي تشابه بينه و بين قسم هندسة الحاسبات اللي في كلية هندسة .. لانك هنا ح تدرس ازاي تربط البرمجة بالهاردوير ... يعني ازاي تبرمج البروسيسور , ازاي تبرمج الهارد ... الكلام ده بيتاخد في قسم هندسة حاسبات , الا ان قسم هندسة حاسبات نشاطه اكتر و اكتر على الهاردوير ... السوفتوير فيه قليل شوية ... في قسم نظم الحاسبات , انت البرمجة ح تاخدها بشكل مكثف عن الهاردوير , مع العلم انك ح تاخد هاردوير لكن شوية برضه .. المواد باختصار بتتكلم عن اساليب امان الاسبات , و البرمجة الهيكلية و المعماريات المتوازية .. الكلام ده مش ح تعرفه الا لما تدخل الكلية بنفسك و تفهمها ... لكن عموماً القسم يدرس ربط البرمجة بالهاردوير ... و حقيقة لا اعلم اللقب ح يبقى ايه , لكن المستقبل مشرق لانه قسم من امتع الاقسام ... القسم موجود في جامعة عين شمس و فقط ..

جـ - قسم الحسابات العلمية Scientific Computing Department = SC : القسم ده يمكن بيركز على الرياضيات اكتر ... لانك هنا ح تتعلم رسم الاشكال الهندسية المعقدة بالبرمجة ... و فيه مواد نظري برضه .. المواد باختصار بتتكلم عن نظرية الحسابات , و كيفية الرسم بالحاسب , و دراسة الاحصاء و الاحتمالات ... هنا معرفش برضه ح يبقى لقبك ايه لكن ممكن تشتغل في مركز الحساب العلمي التابع للجامعة ... و مركز الحساب العلمي ده من اهم مراكز اي جامعة في مصر ... او ممكن تشتغل برا مصر ... القسم بلا استثناء ممتع لان الرياضه فيه كتير ... لو بتحب الرياضة بجانب الكمبيوتر كعلم ... يبقى ادخل القسم ده ... طبعاً القسم موجود في جامعة عين شمس و فقط ...

د - قسم العلوم الاساسية Basic Sciences Department = BS : القسم ده بقى ح تدرس فيه اساسيات الكمبيوتر ... اساسيات الكمبيوتر من نحية العلم ... يعني رياضة و فيزيا .. بس كتييير ... طبعاً بجانب المواد النظرية ..... و هنا مقدرش اقول اكتر من كده , لاني لا افقه شيء عن القسم الا قليل من المعلومات ... القسم موجود في جامعة عين شمس و فقط ...

هـ - قسم نظم المعلومات الحيوية Bioinformatics Department : طبعاً هنا القسم خاص ... و معنى كلمة خاص انه بفلوس ... و فلوس كتير مش شوية .. و ح نتكلم عنه ياما شوية : - أولاً القسم ده بيدخله علمي علوم , بس لازم بياخد رياضة 2 في اول سنة .. - ثانياً ممكن علمي رياضة برضه يدخله , بس ح ياخد احياء طول دراسته في القسم ده .. - ثالثاً مصاريف القسم بتوصل لـ 12 الف جنيه في السنة و يُقال انه 18 الف جنيه في السنة .. - رابعاً : التخصص فيه من اولى ...
هنا القسم ممتع و لذيذ في دراسته لانك بتاخد العلم الطبي و بتطبقه الكترونياً ... هنا في القسم ده بتدرس ازاي تبرمج الشرايح الالكترونية اللي بتعالج الناس من اشد الامراض , ازاي بتدرسها و ازاي بتجربها ... طبعاً الشرايح انواع و المواد كتيير في القسم ده ...
هنا القسم ده مش شبيه بالهندسة الطبية , لان الهندسة الطبية بتركز على صيانة المعدات الطبية .. اما هنا فانت بتتعلم ازاي تبرمج المعدات دي للتشغيل ... اي ربط البرمجة بالطب او تقدر تسميها : البرمجة الطبية ...
القسم لذيذ جداً جداً ... فلو معاك فلوس و نفسك فيه , يبقى ادخله ... معكش فلوس و نفسك فيه , يبقى هذا قضاء الله ...
و لو دخلته , يبقى لازم على الاقل تجيب جيد ... لانك لو شلت مادة بتدفع اكتر ... اما عن المستقبل , فمقدرش اقول لك , كل اللي اقدر اقولهولك انك ح تبقى اكبر من اي مهندس بترول ... اسمك مهندس معلومات طبية و ده بره مصر للأسف .. شغلك ح يتوقف هنا على المستشفيات و المستشفيات الخاصة بالذات ... و ممكن برا مصر في اكبر مستشفيات فيكي يا اوروبا ... و مرتباتك خيالية و فوق الوصف ... القسم موجود في جامعة عين شمس و فقط ...

و - قسم نظم المعلومات الجغرافية Geographic Information Systems = GIS : ده بقى قسم جميل و حلو لمحبي الاتصالات ... هنا يمكن القسم مش شبيه بهندسة اتصالات , لان اتصالات بتركز على الكهرباء ... هنا انت بتركز على الكمبيوتر ... هنا بتتعلم دراسة الرادار و شاشات المراقبة و الاقمار الصناعية و الكلام الكبير ده ... طبعاً الاهتمام هنا جغرافيا على كمبيوتر ... و ده يعتبر دراسة للاتصالات ... هنا ح تبرمج الرادار و القمر الصناعي ... القسم موجود في قلة قليلة من كليات الحاسبات و المعلومات , لكن عموماً انت ح تاخده كمادة في سنة رابعة ضمن قسم نظم المعلومات ... مستقبل القسم ممتاز عموماً ... و مرتباتك فوق الوصف برضه ... يُذكر ان القسم او يُعتقد انه في جامعة القاهرة ... لكن حقيقة , لا اعلم الا انه موجود في بعض من الجامعات المصرية ... ز - قسم هندسة البرمجيات Software Engineering Department = SE : ده قسمي بقى ... و ح نتكلم عليه كتير : - أولاً : واضح من الاسم ان لقبك رسمياً جوه مصر او بره مصر مهندس برمجيات , لانك ح تحصل على بكالوريوس الحاسبات و المعلومات - قسم هندسة البرمجيات .. - ثانياً : القسم ساعات معتمدة زيه زي القسم الجديد اللي في عين شمس ... - ثالثاً : القسم موجود في جامعة حلوان و فقط ... - رابعاً : مصاريف القسم اخفّ من مصاريف قسم عين شمس الجديد , السنة تعمل لها 7500 جنيه ... - خامساً : التخصص فيه من اولى .. هنا بقى الكلام ح يختلف , لانك هنا ح تاخد كل لغات البرمجة اللي في الدنيا .. المواد هنا عبارة عن خليط من مواد علوم حاسب على نظم معلومات على بعض من تكنولوجيا المعلومات على مواد من هندسة البرمجيات اللي نازله جديد على مواد دعم و اتخاذ قرار ... المواد كتييير , علشان كده التخصص بيبقى من اولى ... طبعاً رغم انك ح تاخد كل لغات البرمجة اللي في الدنيا , الا انك مش ح تاخدها بكمية كبيرة , لان اهتمامك هنا ح ينصب فقط على البرمجيات ثقيلة المعيار او اللي بيسموها عالية الجودة .. بالبلدي , مش اي برامج ح تصممها ... يعني ح تعمل برامج كبيرة .. طبعاً زائد انك مهندس , يعني لازم ح تتعلم التسويق و اتخاذ القرار و التخطيط , لان الهندسة مش رسم زي ما انت فاكر و خلاص ... الهندسة رسم و تخطيط و اقناع و تصميم و تنفيذ و اشراف .. هنا طبعاً المستقبل مفتوح مفتوح .... لان التخصص جديد و مش موجود حتى في اي كلية هندسة .. مش موجود حتى في اي جامعة خاصة ... طبعاً مكانتك لن تقل عن مهندس البترول ... بل اعلى من مهندس البترول ... لان شركات الكمبيوتر محتاجة التخصص ده و بشده ... القسم موجود في جامعة حلوان و فقط ...

ح - قسم بحوث العمليات و دعم اتخاذ القرار Decision Support And Progresses Researches = DS-PR = DS : و ده آخر قسم ح نتكلم عليه ... طبعاً هنا يمكن ح تاخد مواد رياضية كتير و مواد فيها حفظ ... و برمجة مش كتيرة برضه .. لكن هنا الدراسة ممتعة , لانك ح تدرس ازاي تتخذ القرار في اي عملية الكترونية , و ازاي تناقشها باسلوب علمي بحت ... طبعاً يُقال ان هذا القسم هو القسم الوحيد اللي محتاج واسطة , لان شغلك ح يبقى في مراكز حساسه زي رئاسة الجمهورية و مجلس الوزراء و مراكز دعم اتخاذ القرار الحكومية التابعة للرئاسة ... مراكز حساسة جداً جداً ...
لكن لو عاوز القسم ده , يبقى لازم اجتهادك في المقام الاول ... لان اجتهادك هو واسطتك بعد ربنا سبحانه و تعالى ... القسم موجود في جامعة القاهرة و المنصورة ....

المسمى الوظيفى

فى البداية متفكرش كتير فى المسمى الوظيفى ليك لو داخل حاسبات عشان يبقى اسمك مهندس فبلاش تدخلها افضل ركز اكتر على مستقبلك واشتغل ع نفسك حتى الان مفيش مسمى متفقين علية بسبب عدم وجود نقابة لخريجى حاسبات ومعلومات اسمك الوظيفى فى اى دولة خارج مصر مهندس برمجيات انما فى ام الدنيا اسمك بيختلف على حسب شغلك والمكان الي شغال فية يعنى ممكن يكون اسمك مبرمج او فنى حاسب الى او مهندس برمجيات او مهندس شبكات الخ.. الاسامى كتير

الوظائف المتاحة لخريج حاسبات

هناك كثيرٌ من الأعمال التي لا حصر لها، ولكن في هذه القائمة جمعت 51 وظيفة من الممكن أن يعمل بها خريج علوم الحاسوب من مختلف التخصصات.
محلل نظم Systems Analyst.
محلل أعمال Business Analyst.
محلل عمليات أعمال Business Process Analyst.
أخصائي نظم Systems Specialist.
مهندس بيانات Data architect.
مطور قواعد بيانات مايكروسوفت اس كيو ال Microsoft SQL Database Developer.
إداري قواعد بيانات مايكروسوفت اس كيو ال Microsoft SQL Database Administrator.
مطور قواعد بيانات أوراكل Oracle Database Developer.
إداري قواعد بيانات أوراكل Oracle Database Administrator.
مطور تكامل قواعد بيانات Database Integration Developer.
مطور تطبيقات ويب Web Developer.
مهندس دعم Support Engineer.
مدير نظام System Administrator.
باحث Researcher.
مهندس برمجيات Software Engineer.
مدير برنامج بحوث Research Program Manager.
مختص نظم طبية Medical Application Specialist.
مدير شبكات Network Manager.
مدير مشروع IT Project Manager.
مدرب Coach.
مشرف موقع Web Administrator
. محلل نظام تخطيط موارد المؤسسات ERP System Analyst.
مطور نظام تخطيط موارد المؤسسات ERP Developer.
مدير نظام تخطيط موارد المؤسسات ERP Application Manager.
محلل تقني لنظم تخطيط موارد المؤسسات ERP Technical Analyst.
مدير تقنية المعلومات IT Manager.
مدير التطوير Development Manager.
مدير تحليل النظام System Analysis Manager.
مدير إختبار النظام Testing Manager.
مختبر نظم وظيفي Functional Tester.
مختبر نظم تقني Technical Tester.
ضامن جودة Quality Assurance.
مختبر أداء النظم Load Tester.
مراجع تقنية معلومات IT Auditor.
محلل دعم Support Analyst.
مهندس دعم Support Engineer.
أخصائي أمن معلومات تقني Information Security Specialist.
محلل أمني Security Analyst.
محقق جرائم أمن معلومات Information Security Crime Investigator.
محلل أمني Security Analyst.
مهندس أمن شبكات Network Security Engineer.
مختبر إختراق نظم Application Penetration Tester.
محلل مخاطر إنترنت Cyber Risk Analyst.
محلل وظيفي – ساب SAP Functional Analyst.
محلل برمجي – ساب SAP Programmer Analyst.
مدير مشروع – ساب SAP Project Manager.
محلل دعم – ساب SAP Support Analyst.
مستشار – ساب SAP Consultant.
قائد فريق Team Leader.
مهندس مستودعات البيانات Data Warehouse Architect.
مشرف مركز بيانات Data Center Supervisor.